សៀមរាប៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានថ្លែងថា ក្នុងនាមជាប្រមុខរាជរដ្ឋាភិបាលការដែលមានអង្គរក្សសម្រាប់ការពារគឺជារឿងត្រឹមត្រូវ និងចាំបាច់ ខណៈអ្នកដែលប្រឆាំងការមានអង្គរក្សសម្រាប់អ្នកទាំនោះគឺដូចទៅនឹងការចង់ធ្វើរដ្ឋប្រហារដូច្នោះ។

ថ្លែងនៅក្នុងវេទិកាសាធារណៈក្នុងជំនួបជាមួយនឹងប្រជាពលរដ្ឋនៅក្នុងភូមិរុនតាឯក ស្រុកបន្ទាយស្រី ខេត្តសៀមរាប នៅព្រឹកថ្ងៃទី១៣ ខែកញ្ញានេះ សម្ដេចតេជោ ហ៊ុន សែន បានថ្លែងថាប្រសិនជាសុវត្ថិភាពរបស់នាយករដ្ឋមន្ត្រីត្រូវបានគំរាមកំហែងស្ថានភាពប្រទេសក៏នឹងច្របូកច្របល់ផងដែរ ដូច្នេះការដែលមានអង្គរក្សសម្រាប់ការពារនាយករដ្ឋមន្ត្រីគឺជារឿងចាំបាច់ដើម្បីរក្សាស្ថេរភាពនិងសន្តិសុខសម្រាប់ប្រទេស។

សម្ដេចតេជោថា៖ «អ្នកណាដែលប៉ុនប៉ងរំលាយកម្លាំងអង្គរក្សដែលការពារ គឺអ្នកនោះប៉ុនប៉ុងធ្វើរដ្ឋប្រហារ ឬប៉ុនប៉ងសម្លាប់ខ្ញុំ»។

សម្ដេចតេជោបានបញ្ជាក់ថា ក្នុងពេលដែលសម្ដេចដឹកនាំប្រទេស គឺមិនអនុញ្ញាតឲ្យមានរដ្ឋប្រហារណាផ្ដួលរំលំរាជរដ្ឋាភិបាលកម្ពុជាបានទេ។

បើតាមសម្ដេចតេជោ សម្ដេចត្រូវបានគេធ្វើរដ្ឋប្រហារចាប់ដាក់នៅក្នុងផ្ទះម្ដង និងប៉ុនប៉ងធ្វើរដ្ឋប្រហារបីដង និងធ្លាប់ត្រូវបានគេរៀបគម្រោងសម្លាប់ម្ដងនៅឆ្នាំ១៩៩៨ ក្នុងខេត្តសៀមរាប៕

^{PHOTO: EAC NEWS}